სახელმწიფო რწმუნებულის ადმინისტრაცია

იმერეთში სახელმწიფო რწმუნებულის–გუბერნატორის გივი ჭიჭინაძისა და ვიცე–გუბერნატორ იოსებ ხახალეიშვილის ვიზიტი შვეიცარიის კონფედერაციაში დასრულდა. სამხარეო ადმინისტრაციის ხელმძღვანელებთან ერთად დელეგაციაში იმყოფებოდა ქუთაისის წერეთლის სახელმწიფო უნივერსიტეტის რექტორი გიორგი ღავთაძე. 

ვიზიტის ფარგლებში დელეგაცია ესტუმრა ფრიბურგის კანტონის სოფლის მეურნეობის ინსტიტუტს, (http://www.fr.ch/iag/fr/pub/index.cfm) სადაც შეხვედრა გაიმართა ინსტიტუტის დირექტორთან, პასკალ ტოფელთან. დელეგაცია გაეცნო სოფლის მეურნებობის დარგში ფრიბურგის კანტონის მიღწევებსა და გამოცდილებას. იმერეთის გუბერნატორმა სოფლის მეურნეობის ინსტიტუტის წარმომადგენლები იმერეთის რეგიონში მიიწვია, რათა მათ ადგილზე ნახონ ორმხრივი თანამშრომლობის პოტენციალი. დელეგაცია ასევე გაეცნო ფრიბურგის კანტონის სატყეო, სანადირო და მეთევზეთა სამსახურის მუშაობას და მოინახულა თანამედროვე ტექნოლოგიებით აღჭურვილი თბოელექტროსადგური. დელეგაციას უმასპინძლა ქალაქ გროლის მერმა კრისტიან დიოკოტერმა. 

დელეგაციამ და საქართველოს საელჩოს წარმომადგენლებმა ასევე, შეხვედრა გამართეს ფრიბურგის კანტონის (http://www.fr.ch/ww/fr/pub/index.cfm) პრეზიდენტთან, მარი გარნიესთან. მოხდა ინფორმაციის გაცვლა იმერეთის რეგიონისა და ფრიბურგის კანტონის შესაძლებლობების შესახებ, კანტონის პრეზიდენტმა კიდევ ერთხელ დაადასტურა მზადყოფნა, ხელი შეუწყოს ორ რეგიონს შორის მეგობრობისა და თანამშრომლობის პროცესს. 

იმავე დღეს დელეგაციამ შვეიცარიის სიდიდით მეორე რძის გადამამუშავებელი კომპანია "Cremo" (http://www.cremo.ch/EN/index.asp) და ფრიბურგის კანტონის წყლის მომარაგების კომპანია მოინახულა.

განსაკუთრებით უნდა აღინიშნოს შეხვედრები განათლების მიმართულებით. შეგდა შეხვედრა ფრიბურგის უნივერსიტეტში, (http://www3.unifr.ch/home/en/), რომელიც მთელს შვეიცარიაში ერთ–ერთი წამყვანი სასწავლო და ერთადერთი ორენოვანი უნივერსიტეტია (ფრანგულ-გერმანული). ზოგადი მიმოხილვის შემდეგ, ქუთაისის წერეთლის სახელმწიფო უნივერსიტეტის რექტორმა, გიორგი ღავთაძემ, შვეიცარიელ კოლეგებს შესთავაზა თანამშრომლობის დაწყება უნივერსიტეტებს შორის, რაც ვიცე-რექტორმა დიდი ინტერესით მიიღო და გამოხატა ფრიბურგის უნივერსიტეტის მზადყოფნა კონკრეტული პროექტების დასაწყებად.

ასევე მნიშვნელოვანი იყო ბერნში, საელჩოს მიერ ორგანიზებული შეხვედრა ბერნის გიმნაზია Muristalden-ის (http://www.muristalden.ch/gymnasium/informationen/gymnasium/) პრორექტორებთან, ანდრეას გროიბთან და მარტინ ფიშერთან. საუბრის თემას წარმოადგენდა ქუთაისის პირველ საჯარო სკოლასთან პარტნიორული ურთიერთობების დაწყების საკითხი. ვიცე–გუბერნატორმა იოსებ ხახალეიშვილმა, რომელიც ამავე სკოლის კურსდამთავრებულია, დეტალურად მიაწოდა ინფორმაცია შვეიცარიულ მხარეს სკოლის ისტორიის, მიმდინარე და სამომავლო გეგმების შესახებ. მიღებულ იქნა გადაწყვეტილება 2016–2017 სასწავლო წლის ფარგლებში მოსწავლეთა და მასწავლებელთა გაცვლითი პროგრამის ორგანიზების შესახებ.

იმერეთის დელეგაციის ვიზიტი შვეიცარიის კონფედერაციაში ფრიბურგის კანტონის მთავრობის მოწვევით შედგა და საქართველოს საელჩოს მიერ იყო ორგანიზებული. იმერეთის სამხარეო ადმინისტრაცია მადლობას უხდის საქართველოს ელჩს შვეიცარიაში ირაკლი ყურაშვილსა და საელჩოს უფროს მრჩეველს ილია მარჯანიძეს, აღნიშნული ვიზიტის მაღალ დონეზე ორგანიზებისათვის.