სახელმწიფო რწმუნებულის ადმინისტრაცია

საჩხერის მუნიციპალიტეტის, სოფელ ჩიხაში მიმდინარეობს საავტომობილო ხიდისა და ხიდთან მისასვლელი გზების მოწყობის სამუშაოები. პროექტის ფარგლებში მდინარე ყვირილაზე მოეწყობა ერთი მასშტაბური საავტომობილო ხიდი, რომლის დასრულების შემდეგ განიტვირთება ქალაქის ცენტრალური ნაწილი, ასევე ჩიხისა და ჭალის ადმინისტრაციულ ერთეულებში შემავალი სოფლების (13 სოფელი) მაცხოვრებლები ისარგებლებენ უმოკლესი გზით.

 

აღნიშნული სამუშაოები სახელმწიფო ბიუჯეტიდან 4 835 480 ლარით არის დაფინანსებული.

 

ასევე, ხიდის მშენებლობა მიმდინარეობს ჭიათურაში. რკინიგზის სადგურის მიმდებარედ საფეხმავლო ხიდის მშენებლობა დააკავშირებს იაშვილისა და ჭავჭავაძის ქუჩებს. პროექტის ფარგლებში მოეწყობა ლითონის კონსტრუქცია, მინის გადახურვითა და მინის მოაჯირებით, დამონტანდება დეკორატიული სანათები.

 

სპორტული ინფრასტრუქტურის გაუმჯობესების მიზნით საჩხერესა და ჭიათურაში არაერთი პროექტი ხორციელდება. საჩხერეში, აქტიურ ფაზაშია მრავაფუნქციური სპორტული დარბაზის სამშენებლო პროცესი. სპორტული კომპლექსი სრულად განახლდება და ადაპტირებული იქნება შეზღუდული შესაძლებლობების მქონე პირებისთვის. აღსანიშნავია, რომ შენობიდან თბოდანაკარგების შემცირების მიზნით, პროექტი ითვალისწინებს ენერგოეფექტურობის ღონისძიებებს, გათბობის, ვენტილაციის და განათების სისტემების ენერგოდამზოგ გადაწყვეტებს, გადახურვის და კედლის თბოიზოლაციას.

 

დღესვე სახელმწიფო რწმუნებულმა ჭიათურაში, ღია საცურაო აუზისა და სპორტული მოედნების მშენებლობა-რეაბილიტაციის პროცესი დაათვალიერა. პროექტით გათვალისწინებულია 2 აუზის მშენებლობა, ასევე ადმინისტრაციული შენობის, პარკინგის, ბილიკების მოწყობა, ტერიტორიის გამწვანება, გარე განათების და ძელსკამების დამონტაჟება.

 

ჭიათურას, მოსახლეობის პრიორიტეტების გათვალისწინებით კიდევ, ერთი რეკრეაციული სივრცეც დაემატა.