სახელმწიფო რწმუნებულის ადმინისტრაცია

ქუთაისში ამ ეტაპზე ევროკავშირის ფინანსური მხარდაჭერით 11 პროექტი ხორციელდება, რომელთა ღირებულება 13 000 000 ლარამდეა. მათ შორის არის: საგზაო ინფრასტრუქტურის მოწესრიგება, დასასვენებელი სივრცეების მოწყობა, დავით აღმაშენებლის მოედანზე მდებარე ცენტრალური შადრევნისა და 100 საფეხურიანი კიბის რეაბილიტაცია.

,,საპილოტე რეგიონების ინტეგრირებული განვითარების პროგრამის ფარგლებში, რომელიც ხორციელდება ევროკავშირის მხარდაჭერით, იმერეთის 12-ვე მუნიციპალიტეტში მიმდინარეობს აქტიური სამუშაოები. ცალკე ქუთაისისთვის დაახლოებით 30 000 000 - მდე ლარი გვაქვს ბიუჯეტი, საიდანაც მიმდინარეობს უკვე 13 000 000 ლარის სამუშაოები და წლის ბოლომდე კიდევ დაიწყება და დასრულდება დამატებით 17 000 000 ლარის ღირებულების სამუშაოები. თანხები მიმართულია ისეთ პროექტებზე, როგორიცაა საგზაო ინფრასტრუქტურის მოწესრიგება, რეკრეაციული სივრცეების მოწყობა და ასე შემდეგ“ - ზვიად შალამბერიძე.

 

აღნიშნული ინფრასტრუქტურული პროექტების მონიტორინგი პერმანენტულად მიმდინარეობს და სპეციალისტები სამუშაოების შესრულების ხარისხს ადგილზე ეცნობიან.

 

საპილოტე რეგიონების ინტეგრირებული განვითარების პროგრამის ეგიდით, იმერეთში 2021-2022 წლებში განსახორციელებელი ინფრასტრუქტურული პროექტებისთვის 69 656 927 ლარია გამოყოფილი.

 

ევროკავშირის მიერ დაფინანსებული 2020-2022 წლების საპილოტე რეგიონების ინტეგრირებული განვითარების პროგრამა გულისხმობს მიზნობრივი ღონისძიებების დაფინანსებას საქართველოს ოთხ საპილოტე რეგიონში - კახეთი, იმერეთი, გურია და რაჭა-ლეჩხუმი-ქვემო სვანეთი.

 

პროგრამა საქართველოს მთავრობამ 2019 წლის 20 დეკემბერს დაამტკიცა და მისი წინასწარი ჯამური ბიუჯეტი 200 მილიონი ლარია. ამასთან, საპილოტე რეგიონებში განსახორციელებელი პროექტები თანადაფინანსდება მუნიციპალიტეტების საკუთარი ბიუჯეტიდან.