სახელმწიფო რწმუნებულის ადმინისტრაცია

საქართველოს რეგიონული განვითარებისა და ინფრასტრუქტურის მინისტრის მოადგილემ მზია გიორგობიანმა და 4 რეგიონის (იმერეთი, კახეთი, გურია, რაჭა-ლეჩხუმი-ქვემო სვანეთი) ხელმძღვანელმა პირებმა, ონლაინ პლატფორმის საშუალებით საპილოტე რეგიონების ინტეგრირებული განვითარების პროგრამის მიმდინარეობა განიხილეს. იმერეთში სახელმწიფო რწმუნებულმა ზვიად შალამბერიძემ დეტალურად ისაუბრა პროგრამის ფარგლებში მიმდინარე და განსახორციელებელ პროექტებზე. ასევე, ყურადღება გაამახვილა იმ წინადადებებსა და ინიციატივებზე, რომლებიც შესაბამის კომისიას უახლოეს მომავალში წარედგინება.

2021 წელს, საპილოტე რეგიონების ინტეგრირებული განვითარების პროგრამის პრიორიტეტებია: ურბანული განახლება - ინტეგრირებული აქტივობები ურბანულ ტერიტორიებზე, უნიკალური პოტენციალის გამოყენებით ტურიზმის განვითარების ხელშეწყობა და ინტეგრირებული ადგილობრივი განვითარება.

იმერეთში ამ მიმართულებით, 2021-2022 წლებში განსახორციელებელი ინფრასტრუქტურული პროექტებისთვის 69 656 927 ლარია გამოყოფილი.

2020-2022 წლებში საქართველოში რეგიონების ინტეგრირებული განვითარების საპილოტე პროგრამა წარმოადგენს სახელმწიფო პროგრამას, რომელიც ემყარება ევროკავშირის რეგიონული განვითარების პოლიტიკას. პროგრამის მიზანია, ხელი შეუწყოს დაბალანსებულ და მდგრად სოციალურ-ეკონომიკურ განვითარებას ტერიტორიული განვითარების ინტეგრირებული ინიციატივების განხორციელების გზით.