სიახლეები

შრომის უსაფრთხოების ოფიცრების მოსამზადებელი პროგრამა დაიწყო

9 დეკემბერი, 2019

სახელმწიფოს მიერ დაფინანსებულმაპროფესიულმაკოლეჯმა "კონსტრუქტ2“ შრომის უსაფრთხოების ოფიცრების მოსამზადებელი პროგრამა დაიწყო. შედეგად, ორ წელიწადში აღნიშნული მიმართულებით დასაქმების ბაზარზე არსებული კადრების დეფიციტი აღმოიფხვრება.

დღეს “კონსტრუქტორ2"-ში მოკლევადიანი მომზადების პროგრამასა და შრომის უსაფრთხოების და გარემოსდაცვითი ტექნოლოგიებზე სასწავლო პროცესი დაიწყო, რომელსაც სახელმწიფო რწმუნებული იმერეთის მხარეში ზვიად შალამბერიძე, ქუთაისის ვიცე-მერი ნინო თვალთვაძე და ზესტაფონის მუნიციპალიტეტის მერი გიორგი გოგლიჩიძე ესწრებოდნენ.

ღონისძიების ფარგლებში დამსწრე საზოგადოებამ ინფორმაცია მიიღო კოლეჯის რეგიონული და საერთაშორისო მნიშვნელობის, ასევე პროფესიული განათლების აქტუალობისა და სამომავლო პერსპექტივების შესახებ.

მოკლევადიანი მომზადების პროგრამა უკვე წარმატებული პროექტია და სტუდენტთა მესამე ნაკადს იღებს, შრომის უსაფრთხოების და გარემოსდაცვითი ტექნოლოგიების პროგრამაზე კი „კონსტრუქტ2“ პირველად ახორციელებს მსმენელთა მიღებას. პროგრამა მიზნად ისახავს კვალიფიციური კადრების მომზადებას, რომლებიც შრომის დაცვითი ღონისძიებების დანერგვასა და მართვას უზრუნველყოფენ.

„როგორც მოგეხსენებათ „შრომის უსაფრთხოების შესახებ“ ახალი კანონის შესაბამისად, ყველა კომპანიას უნდა ჰქონდეს შრომის უსაფრთხოების ოფიცრის შტატი. ახალი რეგულაციების შედეგად კი დასაქმების ბაზარზე ამ პროფესიის ადამიანების დეფიციტი გაჩნდა, თუმცა სახელმწიფომ ეფექტიანად იმუშავა და მოთხოვნის შესაბამისად გაზარდა მოწოდებაც. ამის მაგალითია სახელმწიფოს მიერ დაფინანსებული პროფესიული კოლეჯი „კონსტრუქტ2“, სადაც დღეს ვიმყოფებით და რომელმაც უკვე შრომის უსაფრთხოების და გარემოსდაცვითი ტექნოლოგიების პროგრამაზე პირველი სტუდენტები მიიღო“. - განაცხადა სახელმწიფო რწმუნებულმა იმერეთში ზვიად შალამბერიძემ.