სახელმწიფო რწმუნებულის ადმინისტრაცია

წყალტუბოს მუნიციპალიტეტის მერმა, გრიგოლ იოსელიანმა, საზოგადოებას ცხრა თვის ანგარიში წარუდგინა. ადგილობრივი თვითმმართველობის მიერ გაწეულ საქმიანობას იმერეთში სახელმწიფო რწმუნებული ზვიად შალამბერიძე, არასამთავრობო ორგანიზაციების წარმომადგენლები და მოქალაქეები გაეცნენ.

საანგარიშო პერიოდში მუნიციპალიტეტში 60 ინფრასტრუქტურული პროექტი დასრულდა. ქალაქისთვის უმნიშვნელოვანესი პროექტი განახორციელა მუნიციპალური განვითარების ფონდმა, რომლის ფარგლებშიც წყალტუბოს კანალიზაციის გამწმენდი სათავე ნაგებობა აშენდა. სამუშაოების ღირებულება 8.7 მილიონ ლარს შეადგენს. ინფრასტრუქტურულ პროექტებზე გამოყოფილი 20 მილიონის ფარგლებში: მოწესრიგდა ცენტრალური და შიდა საუბნო გზები, რეაბილიტაცია ჩაუტარდა საბავშვო ბაღებს და აშენდა ერთი სკოლამდელი აღზრდის დაწესებულება, მიმდინარეობს ორი საჯარო სკოლის მშენებლობა, 6 სოფელში ამბულატორიების მშენებლობა განხორციელდა და ასევე, სოფლებში აქტიურად მიმდინარეობს სასწრაფო დახმარების ცენტრების მშენებლობა. აღნიშნულ პერიოდში, წყალტუბოს მუნიციპალიტეტში 4 სოფელი სრულად გაზიფიცირდა.